BANAT DIALECT NEWS: POLIS BAWAL SA
SABUNGAN
MANILA,
MAY 5, 2008 (STAR) Ni Edwin Ian Melecio - Giawhag ni Sr. Supt.
Carmelo Valmoria hepe sa Cebu Provincial Police Office ang publiko sa
pagsumbong sa iyang buhatan pinaagi sa text o pagtawag sa telepono kung duna
silay makit-ang mga polis nga naa sa bulangan o tigbakayan nakasibilyan man
o nakauniporme.
Kini subay sa kamandoan sa PNP kaniadto pa nga gidid-an ang mga polis sa pag-adto sa mga sugalan ilabi na sa mga tigbakayan sanglit gikatahong nakadaut kini sa imahe sa ilang organisasyon.
Matud pang Valmoria kung dunay litratong ebidensya mas maayong ipadala kini ngadto sa iyang buhatan aron maaksyunan kini ug aron maimbestigahan ang maong mga polis.
Kini human mamatikding dunay pipila ka mga polis ang makit-ang naa sa mga tigbakayan ug sabungan dinhi sa lalawigan ma naa may selebrasyon o wala.
“Duna tay policy sa PNP kaniadto pa nga nagdili sa atong mga sakop nga manulod anang mga cockpit bisan legal pa or not nga mga arena. As a member of the uniformed organization we are bound to follow orders,” asoy pang Valmoria.
Ang tigbakay kon sabong tradisyonal ng kalingawan sa mga Pilipino sa dugay nang panahon apan tungod kay sugal kini gikunsiderar kini sa kadagkoan sa PNP nga dili maayo kung ang mga polis nga maoy tigpatuman sa balaod maoy mag-una sa pagpahigayon ug pagsuporta niini.
Wala hinuon mohisgot si Valmoria kung unsa kabug-at ang silot niini apan kini makunsiderar nga kaso gihapong administratiba batok sa mga polis nga masakpan sanglit duna nay kamandoan kon direktiba ang PNP kabahin niini.
Alang sa mga impormanteng gustong mopaabot og reklamo sa batok sa mga polis ug bisan unsa pa mang impormasyon may labot sa mga ilegal nga kalihukan ug krimen giawhag sila sa pagtawag ug pagpadala og text sa telepono sa CPPO hotline 0918-8277600 o ba kaha sa mga police station hotlines diin hasta ang hepe sa mga police stations gimando na nga ipabutang usab sa pampublikong dapit.